CONFESHON SERCA UN SACERDOTE

CONFESHON SERCA UN SACERDOTE

Reconciliacion of Confesion ta e sacramento, den cua Hesus pa medio di un sacerdote ta pordona e picanan, cu a comete despues di Bautismo. Asina nos ta reconcilia cu Dios y cu nos rumannan cristían.  Laga nos analisa loke Hesus a bisa su Apostelnan (no na e pueblo general): Huan 20,21-23.  "Pas sea cu boso ": den Confesion e pecador ta reconcilia cu Dios y tin pas entre hende cu Dios.  E hende a kibra e paso Den e frase aki Hesus ta mustra un aspecto profundo di loke E ta institui: e sacramento, cu ta duna hende pas, pasobra pica ta algo cu ta perturba hende den henter su ser.  "Manera Tata a manda Mi, asina Ami tambe ta manda boso ". Hesus a duna su apostelnan e mesun mision, cu El a bin cumpli cu ne, esta reconcilia hende cu Dios. Mt 9,10-13: "Mi no a bin pa yama hende husto, ma pa yama pecadornan ".  Mt 1,21: "Y lo bo yama e yiu 'Hesus', pasobra lo E  salba su pueblo for di pica ''.  Aki nos por concIui cu Hesus tabata bisa: Manera cu Mi a bin na mundo pa reconcilia hende cu Dios, asina tambe Mi ta yama boso pa cumpli cu e mision.  "El a supla riba nan y a bisa: 'Ricibi Spirito Santo. Si boso pordona un hende su picanan, nan ta keda pordona '". Esaki ta un echo hopi importante di e sacramento. Esun cu boso pordona, nan pica lo keda pordona; si boso no pordona e picanan, nan no ta keda pordonal  E versiculo aki ta mustra e necesidad di bisa e picanan na e sacerdote, pasobra e sacerdote mester sa pa descerni cua pica ta keda pordona of cua no ta keda pordona.  Hesus a priminti Pedro e poder pa pordona pica: Mt 16,18. Y den Mt 18,18 e Apostelnan. Loke ta mara of cadena hende ta e pica: Huan 8,34.  Tempo di e Apostelnan ya a practica confesion caba: Ech 19,18 y Hac 5,14.16.  Den 2 Cor 5,18.20 nos ta mira, cu e apostelnan a transmiti e poder di pordona pica pa e ministronan, cu nan lo bai ordena. Pablo no a haya e poder aki di Cristo den Huan 20,19-23. El a keda transmiti na dje.  Den Testament Bieu tambe sacerdotenan tabata practica confesion: Lev 5,5-6 y Num 5,7-8. Confesa cerca hende? Nos por tende hende bisa: si mi a ofende Dios, mi ta confesa directamente cerca djE.  Ta con nos por ricibi e pordon dibino di un hende, cu no ta Dios?  Hendenan cu ta pensa asina ta ignora e balor, cu Dios tin pa por transmiti su donnan na humanidad.  Esaki ta e plan normal di Dios.  E bida ta bini di Dios, pero E ta usa un mama y un tata pa dun' e na nos.  Dios ta duna e nacemento di nobo atrabes di un persona cu ta barisa nos.  Nos como catolico ta acepta cu Dios a scohe cierto hende pa pordona pica, hende cu na nan tumo tambe tin cu confesa!  Cristo ta e unico mediador entre Dios y hende (1 Tm 2,5). T'E a dicidi cu lo E ehecuta su mediacion pa medio di confesion. Ei nos ta busca e pordon El a bira e forma normal, cu Hesus kier pa nos buske.  Confesion, manera tur e otro sacramentonan, ta rekiri fe y ta disponibel pa ricibi e gracianan di e sacramento. E rekisitonan principal pa e confesion ta balido ta: arepentimento y proposito pa drecha tur cos cu ta malo. E píca cu nos ta haci, no ta afecta nos relacion cu Dios so, sino cu henter e Curpa mistico di Cristo, esta: tur e creyentenan. Tur pica ta afecta creacion di Dios. Den confesion nos tin oportunidad pa reconcilia nos tanto cu Dios como cu su Iglesia.  Confesion ta un sanacion interior total di e alma. Laga nos comprende y aprecia e regalo, cu Hesus a laga pa nos!